巴黎聖日耳門（PSG）上周中法甲嘅爭射12碼風波，天價新兵尼馬同舊將卡雲尼爆發內訌，然後上禮拜六場波尼馬就「受傷」缺陣。為咗平息風波，據西班牙《國家報》話，PSG會長艾卡拉菲打算畀100萬歐元（約930萬港元）獎金卡雲尼，代替佢奪得神射手獎所得嘅同樣獎金，但呢位烏拉圭射手一口拒絕，睇嚟今次錢未必解決到問題喎！
爭射12碼搞到想離隊
自艾卡拉菲為首嘅卡塔爾財團入主後，錢解決到嘅問題，對PSG嚟講就唔成問題，但今次遇到麻煩嘞！PSG上周中靠兩個烏龍波贏里昂，不過完場前10分鐘嘅12碼，就出現尼馬同卡雲尼爭射場面，而後者爭贏亦都宴客，之後更有傳媒報道話兩大射手返到更衣室都有衝突，要由隊友調停；之後卡雲尼發火走人，甚至吹到話佢想離隊，睇吓AC米蘭收唔收留佢喎。尼馬又咁啱喺上禮拜六嘅聯賽報稱受傷缺陣，球隊即刻畀蒙彼利埃守和0:0。
兩人爭射12碼嘅原因，據講一方面為爭隊中大佬地位，但其實都係錢作怪，因為兩人如果做到法甲神射手，就會有100萬歐元獎金，所以據講艾卡拉菲搵過卡雲尼，就係點都照畀100萬歐元佢，換取佢交出12碼劊子手嘅地位，但卡雲尼就認為唔係錢嘅問題，自己係球隊第三隊長，要肩負起責任所以就拒絕咗，艾卡拉菲嘅如意算盤打唔響喇。
另外，尼馬今季以破世界紀錄2.22億歐元轉會費由巴塞隆拿轉投PSG，究竟佢賺到幾多？據德國《Der Spiegel》引述《Football Leaks》嘅資料，25歲嘅尼馬喺PSG嘅月薪係3,069,520歐元（約2,861萬港元），即係平均每日人工超過100,000歐元，每個鐘頭就袋走4,167歐元（約38,835港元），各位打工仔唔恨得咁多喇。