葉楚航馬房開季後原本只於谷草贏過兩場，呢日（24日）佢終在泥地打開今季沙田勝門，葉楚航同潘頓憑大熱門「赤水神駒」攜手攻下第二場五班1200米泥地，此駒服役首次贏馬，單Win及組合獨贏A1分別派43及25.5元。
四歲澳洲自購新馬「赤水神駒」之前九戰零獎金，表現欠佳，惟上次季內初出配史卓豐，跑田草1200米只輸2.5馬位，已有顯著改善。
呢鋪「赤水神駒」換上澳洲陣營大阿哥潘頓，初跑泥地，被捧成4.3倍最熱門，沿途跟前守好位，末段望空後從內叠加速順勢而出，撳住放頭馬「永常喜」話過就過，就此打開服役勝門，收韁亦勝3.25馬位，亦助之前以「紅星」及「狀元才」累積兩贏谷草的葉楚航，於季內首勝沙田賽事。
第二場係全日首次跑泥地，跑道受天雨影響泥濘一片，結果由三匹內檔馬包辦三甲，依次是4檔「赤水神駒」、2檔「永常喜」及1檔「雄獅動力」，亦係由大熱門行頭偕一對落飛馬組成三重彩，加埋冷馬「好準確」跑第四，四重彩派近3.3萬元。