中大學生會卒之在上星期四自願移除掛在范克廉樓文化廣場嘅香港獨立橫額，過程和平，可見得中大校方與學生會嘅溝通有效，沈祖堯校長在九月十五日要求學生會拆除橫額，否則校方派人去拆，講係咁講啫，據消息人士講，校方好有耐性，一直俾夠充足時間，等學生會有時間討論思考，並保持溝通渠道。學生會等到九月二十一日，氣氛平靜下來之後，搵到足夠、充份理由去拆除橫額，可說釋出善意，希望以後校園內和氣致千祥。
新亞書院院長黃乃正院長在事件發生之初，就同左丁山講，校方、院方與學生有不同意見，不同觀點，發生爭拗，屬人民內部矛盾，可以磋商解決，千祈唔好一棍打落去，將「人民」變為「敵人」，將「人民內部矛盾」演變成「敵我矛盾」，雙方有此意識嘅話，就無事不可商量傾掂佢，最緊要就係不受外間嘅熾熱反應刺激神經，互相對立而將事件升溫。
在教育大學冒犯蔡若蓮嘅大字報及中大之「香港獨立」橫額，有一個共通點，就是不知「始作俑者」係何方神聖，無法證實係本校學生所為，而更似係校外人士走入教大、中大校園偷偷掛上民主牆嘅。直至事件水落石出之前，似乎有理由懷疑係「外人」搵地方搞事，借教大、中大學生過橋。
可惜今天香港社會已經分化，消息一出，好多人未弄清事實之前，就不分清紅皂白，將幾件事混為一談，好似一位退休銀行家對左丁山講：「乜你啲師弟咁低莊，竟然『恭喜蔡若蓮』㗎！」左丁山連忙解釋：「哎吔，大佬，唔好只睇標題，中大生完全不涉及蔡若蓮之事，係有人走入教育大學校園掛大字報啫。」又有一位朋友話：「喂，嗰位新亞學生，即係講粗口嗰位，粗口到聽見面紅，趕佢出校啦。」新亞書院會調查周竪峰之行為是否違反校規，但中大及新亞有無明文規定學生唔准講粗口呢？香港法律有無話講粗口屬犯刑事條例呢？左丁山未聽過有，要因此而重罰學生，有可能會惹來司法覆核。
如果在公開場合講粗口要負刑責，香港就唔會有維園阿伯呢個名詞。何俊仁、梁耀忠、劉慧卿十幾年前不知在城市論壇俾阿伯問候過阿媽幾多次。左丁山亦曾親受其擾，有一次抵受唔住，回頭對住幾位阿伯講：「駛唔駛送幾粒偉哥俾你哋呀？」阿伯們一時為之語塞面都紅晒，想撲埋嚟，警察先生擋住前面，叫左丁山快啲上車鬆人，三十年來，警察在維園城市論壇聽粗口數以萬次計，從來未因此而拉過任何人。