飽受偷食醜聞困擾嘅愛華頓前鋒朗尼依然繼續返工，佢上周六喺球隊以2:1擊敗般尼茅夫嘅英超比賽入面，同對手後衞西蒙法蘭西斯喺禁區爭頂頭槌時，畀對方隻手鋤爆左眼角搞到血流披面。但由於球證冇吹罰，搞到朗尼鬼咁勞氣。朗尼接受治理之後繼續比賽，去到55分鐘終於被調離場，由奧馬尼亞斯入替，領隊朗奴高文賽後就話，換朗尼係因為戰術，而唔係因為受傷。