立法會前秘書長馮載祥之子、現年30歲嘅馮興禮即將出任勞工及福利局政治助理，10月9日履新。佢老闆，即係勞福局長羅致光（CK）噚日發表網誌，為下屬抱不平，話傳媒報道馮興禮背景嗰時，不斷強調馮是誰的兒子，甚至官方照片未發佈前，將佢父親張相放上報紙；佢話每位加入問責團隊嘅成員都有本身嘅能力同抱負，落場踢波嗰時根本唔可能靠父幹。
CK又話，今天出任司局長或在社會上身居要職嘅人大都是靠自己努力打拼；外界討論馮父，反映社會普遍相信有良好「背景」嘅年輕人會有多啲「exposure」（閱歷機會）同發展機會，呢啲正係社會資本（social capital）概念。不過CK其實係藉馮興禮講，當局推出嘅兒童發展基金，畀兒童建立積極人生觀，改善向上流動同脫貧喎。