特首林鄭月娥下個月就發表第一份施政報告，不過好打得嘅佢似乎冇乜需要閉關，之前去英國訪問，剛剛係前日（23日）返香港，噚日一早又去由團結香港基金主辦嘅「創科博覽2017」，下午又再飛去湖南長沙出席泛珠論壇，娥特仲喺佢fb話，原來唔覺唔覺，佢上任兩個幾月已經有9次外訪。
娥特又喺fb話佢個英國之旅十分忙碌，除咗去好多場演講同座談會，仲好高興有機會見番好多好朋友，好似前港督衞奕信、前行政局首席議員鄧蓮如等，亦可以同一啲喺英國居住、讀書嘅香港人見面交流，所以佢不忘多謝一班令訪英之旅順利完成嘅幕後功臣，包括特區政府駐倫敦經貿辦嘅所有同事、Metropolitan Police嘅交警、同埋兩地嘅bodyguards。