今年就係建制最大黨民建聯嘅25年黨慶，前晚佢哋就喺紅館搞黨慶匯演，呢個氣派莫講話冇阿爺條水喉射住嘅民主派及唔上，好多建制派政團都使唔起咁嘅錢。
四老棟篤笑抽林子健水
民記班高層對今次匯演好重視，因為既然訂得紅館場就梗係要表演，而好多民記高層要親自上台表演，除咗有成班民記議員大合唱《同舟之情》外，人稱民記「四老」嘅立法會前主席曾鈺成、前議員譚耀宗、陳鑑林同葉國謙就負責棟篤笑。
咁究竟佢哋表演水平如何呢？八方不予評論，但睇蔣麗芸一身紅衫喺紅旗伴舞下，同班民記議員大唱愛國愛港歌，單係政治正確已贏晒！而有現場嘅民記中人同八方透露，民記四老嘅棟篤笑就由高鐵一地兩檢、蓮塘口岸、粵港澳大灣區，一直講到民主黨林子健都有，而最好笑嗰part咪就係講一地兩檢同林子健咯。
話時話，民記今年黨慶匯演係齋做冇為個黨籌款，而舊年民記搞籌款時，香港中聯辦前主任張曉明送4粒字「度德而處」，就幫民記籌咗1,880萬元，唔知接棒做中聯辦主任嘅王志民使唔使練定啲字，遲吓又幫民記籌款兼打破小明嘅紀錄呢？