今季首兩項分級賽1400米慶典盃、1000米國慶盃10月1日上演，「盃王」練馬師大摩會派邊幾匹馬上陣受關注。被喻為祈普敦「私家馬」嘅中距離新貴「喜旺寶」，人馬合作8次4冠4亞，但祈普敦親口證實將同呢匹忠心馬分手。
「喜旺寶」上季配祈普敦捧走三級賽獅子山錦標，亦係騎者香港首項級際賽頭馬，但隻馬剛周二（19日）試閘，由大摩主帥貝湯美主理，帥權已引起猜測。
祈普敦直認慶典盃仍未卜到座騎，肯定唔會騎「喜旺寶」，但卻未必換貝湯美。祈普敦解釋說：「我失去『喜旺寶』，主因蔡約翰兩匹高分馬『澳斯卡』（128分）同『詠彩繽紛』（126分）料會報名慶典盃，變相令107分之『喜旺寶』只負113磅，我自己最低只可以造116、117磅左右，根本冇可能做到113磅，就算貝湯美亦未必做到。」
香港唔多輕磅騎師，相信大摩亦正為人選而頭痕。祈普敦要同私家愛駒分手，但他仍讚「喜旺寶」係騎師夢寐以求嘅馬匹，希望將來有機會重逢喎！