「導盲．Guide Dog」慈善籌款活動日噚日喺西九龍中心舉行，一早同森美拍片互餵雪糕玩Ice-cream Challenge籌款嘅薯片叔曾俊華，親身出席力撐香港導盲犬協會。大會安排佢戴上眼罩親身體驗由導盲犬帶路，只見佢步步為營，移動緩慢，但都好成功咁避開晒台上障礙物，仲搵到張椅坐低。他之後就話，睇唔到前方，心中會有好大恐懼，但有導盲犬拉住佢，安全感同信任度大增。
重臨西九龍中心受歡迎
活動上面見薯片叔叔同狗仔互動好好，原來佢自幼家中已養狗，𠵱家都養緊一隻，習慣同狗生活，又盛讚導盲犬係好靚嘅狗，人見人愛，尤其狗BB。佢又話，選特首期間都嚟過西九龍中心，今次再嚟現場仍然咁熱情洋溢，活動完咗之後佢又上去巡商場，同小商戶、市民打招呼，勁受歡迎。
講番Ice-cream Challenge，大會話至今已經籌到六位數善款，活動上就有多組加入善舉，其中包括被田北辰tag要找數嘅港鐵車務營運總管李聖基，佢拍住港鐵事務總監蘇家碧上陣，食就食得晒，不過就食到成面都係雪糕；同場食雪糕嘅仲有堪輿學家麥玲玲同藝人張致恆，兩個人為籌款完全不顧儀態。麥玲玲仲話明年係狗年，養狗嘅會行大運，乘機為導盲犬宣傳。
香港導盲犬協會執行總監何宗敏話，香港至今只有26隻導盲犬正服務視障人士，該會另有30隻導盲犬正在受訓，但求過於供下，視障人士要輪候年半先配對到犬隻，呼籲大眾大力支持導盲犬訓練工作。
李八方