練馬師葉楚航這天（24日）運氣甚佳，佢於第七場三班田草1200米，以「僥倖」在柏寶胯下爆冷捧走博愛盃，個人連同第二場由潘頓贏大熱門「赤水神駒」，宣告捧盃兼起孖。
「僥倖」原屬告達理馬房，今次作轉投葉楚航後首戰即贏，藉2檔沿途守四五位好跑，直路一衝彈甩贏2.25馬位，帶挈埋鞍上人柏寶打開今季勝門，單Win及組合獨贏A2分別派113.5及35元。
葉楚航這天（24日）靠一對澳洲騎師潘頓、柏寶建功，個人今季首勝沙田賽事即打孖上，當中柏寶昨日（23日）40歲牛一，這天贏馬捧盃正好補祝生日，難怪佢賽後笑得特別開懷。
「僥倖」是繼第三場麥菲文的「安喜」後，今日第二匹轉廐即勝馬，過去「僥倖」養於告達理旗下累積21戰一贏六位，包括上季初夥拍雷神勝出谷草開齋，呢次則係呢匹六歲馬首勝沙田賽事。
澳洲騎練這天威盡沙田，第七場甚至開出該國騎師大冧巴輕磅馬三重彩，其中11號「僥倖」由柏寶建功，12號貝湯美「威信」跑第二；13號史卓豐「快利」跑第三。第四名才是大熱門雷神的「馬功臣」，四重彩派四萬七千幾。