有人恨做藍波，有人恨做藍保，戲路縱使南轅北轍，只要按部就班畀心機朝願望邁進，前者在文壇洛陽紙貴，後者於戰場大殺四方，文有文韜武有武略，我們都應該衷心恭喜，講聲有志者事竟成。然而字都唔識多個，除褲搞基又耍手擰頭，卻偏偏蓄意向法國詩人看齊，則未免流於拉牛上樹，夾硬抄幾行斷句當係自己心血，徒然令人肉緊；同樣道理，一嚿腹肌突圍而出，擺出指天篤地姿勢毫無史泰龍man到爆風範，反而似《周末狂熱》海報上身材走樣的尊特伏達，好心就咪學人周街狂灑第一滴血啦，笑你乸型嫌影衰同志，讚你勇敢又太口不對心。至於口口聲聲話自己信耶穌基督，屋企居然大搖大擺供奉觀音像，眼尖的圍觀者還找到疑似養鬼仔證據，滿天神佛各師各法，雖曰拜得神多自有神庇佑，叫三飛食糊機會較高，咁嚟實踐大愛同盟，好似真係的確有啲唔係幾好囉。
充大頭鬼不錯能夠自我陶醉，自欺卻未必可以順手欺人，呢嗱，實事求是的業餘福爾摩斯係咁意寫兩封電郵向有關當局諮詢，謊言就瀕臨穿煲，講完「殺無赦」就話強詞奪理否認啫，白紙黑字我問你點抵賴？繼英國及威爾斯，獅城律師會也找不到此人執業資料，網民估計「最大可能性是他有註冊而沒有執業資格，或用了一個一般人估不到的名字在新加坡登記」，想像力豐富的camp精立即懷疑，條友沉迷打基之餘仲熱衷玩同音字，會唔會用咗「棍妖」去註冊啊？執葉律師疑雲，令我想起小時候親戚問「畢咗業未」，謙虛的家長總笑笑口代答：「畢咩業吖，用泥鏟去潷葉就有佢份。」