十幾年前，我哋講開鋒線上嘅進攻拍檔，通常以兩人為單位，好似羅馬里奧同白必圖嘅夢幻組合，又或者舒利亞同瑟頓嘅「SAS」組合以及曼聯三冠王時代令人聞風喪膽嘅黑雙煞約基加高爾。不過，大約近呢五年，因為戰術演變，已經少聽咗一啲兩人嘅鋒線組合，好似近年最勁嘅巴塞MSN同皇馬BBC，都係以三人為單位，而隨住干地上季將3-4-3帶入英超後，更多球隊摒棄傳統英式球隊最鍾意用嘅4-4-2，即係雙前鋒買少見少。
不過，作為戰術先鋒嘅哥迪奧拿，今季雖然打三後衛，但就採用3-5-2，而佢咁做完全係因為隊內有兩名入球能力超卓嘅射手，阿古路同已正式上位嘅巴西20歲新星加比爾捷西斯。頭兩、三輪比賽，阿古路同耶穌仔未完全擦出火花，大家走位有時會重疊，作用太相似，但經過國際賽周大炒利物浦5:0場波，兩人開始搵到默契。唔計啱啱周中英聯盃兩人拆夥，曼城喺兩場英超加一場歐聯分組賽，三場波合共轟入15球；哥帥上季嫌入球少，睇嚟今季暫時呢個「AJ」組合，就十分對辦。
阿古路暫時以五個入球，同曼聯新魔獸盧卡古一齊喺射手榜平起平坐，而耶穌仔亦已經累積四球，即係佢兩個已經加埋入咗九球，周六迎戰榜尾的水晶宮，勢必再有斬獲。紅魔昔日黑雙煞，98/99球季時英超就聯袂轟入35球，但如果計埋歐聯同英足盃等賽事，就入咗53球；家陣呢類鋒線雙人組已由曼聯轉移到曼城，就睇下「AJ」可唔可以超越兩位前輩。不過，要數到近年英超最勁，絕對係2013/14球季嘅蘇亞雷斯同史杜列治，合共入咗52球咁多。