韋達剛憑「狀元才」打開個人今季勝門，毫無疑問壓力會稍減，不過如果成績未能持續，又係隔幾次賽事先贏得一場，始終這位45歲老將只會陷於困局。
所以韋達晨課表現十分積極，力求穩定地持續取得頭馬，才可避過遭人批評退化、hea騎的詬病。今朝(23日)韋達又發功，主動搵主要支持者練馬師霍利時，商量搏殺大計，兩個人更一邊傾一邊往馬房，一齊入倉睇馬，可以話有晒搏殺手影。
周日(24日)沙田日賽，韋達、霍利時合作「快趣的」、「正藍旗」一對馬，相信今朝他們入倉，應該係為了觀看此兩駒，希望了解其最新狀態情況。
其中第二場五班1200米泥地的「快趣的」絕對係韋達頭馬希望所在。此駒一戰泥地即勝未輸過，當時班次路程騎師都同今仗一樣。「快趣的」上場季內初出，在谷草夜馬走勢不俗得第五，只輸兩馬位，熱身後今仗出王牌報名，重返強項泥地，當然是目標所在。