一班崇基校友刊登聯署廣告，表態反港獨，支持新亞書院院長黃乃正，支持中大校長沈祖堯。廣告有近275個名字，搵到40人，係左丁山識咗好耐嘅，主要係老人家嘞，多數係六七十年代畢業嘅。左丁山問其中一位：「阿哥，賣廣告要錢嘅噃，你有冇捐錢呀？」呢位阿哥乃成功人士，捐錢當然冇所謂之至，佢話：「我捐錢唔止一份，好閒啫，表個態兼捐錢，當交保護費。」咦，保護費交俾邊個？有人睇場咩？阿哥大喝一聲：「左丁山咪詐儍扮懵，你懂的。」
騎騎，自己又老又蠢又開始冇記性，邊度懂呀？俾阿哥一鬧，當堂唔敢出聲，問博士C：「有冇人叫你聯署埋一份？」博士C話：「冇呀，我係聯合嘅，崇基佬唔會搵我，你地新亞佬有冇聯署吖？」冇噃，但好似有師弟話收到工聯會新亞佬新亞妹，鄧家彪、何啟明、麥美娟嘅呼籲，要求聯署反港獨，但仲未見到廣告，俾崇基佬爬咗頭。此外又有另一批校友搞緊聯署，相信好快會見報。對聯署呢樣嘢，左丁山從來認為係「表態動作」，並非一定要參加嘅。
博士C原來亦有同感，佢年青時非常愛國，讀完博士就回國服務數年，不辭薪水低微，後來發覺自己來自香港，回香港就無法養妻活兒，於是投向資本主義機構，先至可以回港企穩陣腳，佢對內地發起甚麼「大家表個態」之事，心領神會，避之唯恐不及，但有時避無可避，唯有盡量模稜兩可。左丁山問清楚佢：「喂，聽聞在港中科院院士，召開座談會噃？即係乜嘢意思？」博士C話：「即係事態嚴重，中央急需統一口徑，嚴防有些人各師各法，思想不一。內地幹部就某件事開座談會，即是表態表忠，學習中央核心路線大會，參加者個個皆醒目，人人爭相表示緊跟黨中央路線，只有儍仔儍女，先至會真心真意咁表達真正個人意見嘅啫！」哦，咁就明白咯，座談反港獨，未開會已有結論，違者後果自負！另外做得院士，必定聰明過人，那會給黨員執到痛腳吖？而且呢個世界永遠有人爭上位，表忠唯恐不及，不絕對忠誠就是絕對不忠誠，例如一位律師講港獨殺無赦，幾嚇死人，唔通姚文元王洪文死不眼閉，趁農曆七月來港玩上身？呢啲嘢邪邪地，都係少講為妙。形勢比人強呀，中央傳聲人劉兆佳教授講，如果大學唔搞掂港獨，會招惹中央出手，重杰，故此本地大學校長無法子唔聯署表態，本地書生點可能同槍桿子出政權嘅政黨硬撼吖。
聯署呢回事，屬言論自由，左丁山反對搞港獨，但不願聯署，有頭腦之人，自會明白。