香港律師會每年都會舉行法律周，今年已經係第26年，主題係「『法』在起跑線 跨越110」。法律周2017籌委會主席梁寶儀律師（圖）話，現場會有免費法律諮詢服務，噚日開始喺銅鑼灣時代廣場舉行，今日由早上11時至晚上8時，共100名律師參與，每位市民大約有15分鐘諮詢時間，預計兩日共可以服務500名市民。
對上一次法律周提供免費法律諮詢，已經係10年前，唔知係咪因為最近有太多法律問題引起社會討論，所以律師會提供多啲免費諮詢服務呢？梁寶儀就話，根據過往免費法律諮詢經驗，市民多有僱傭、物業、離婚同遺產等法律問題，亦有小量查詢刑事法，而今年除咗針對成年人嘅法律資訊外，亦會用講故事嘅方式，令小朋友都知道一啲法律知識，兩場免費法律講座亦都已近滿額。