通常特區政府時時掛喺口邊嘅嘢，大家調番轉諗就得㗎喇！署理特首張建宗噚日現身廠商會同埋香港華僑華人總商會合辦嘅《基本法》墨寶玉石碑刻展覽。
張建宗提到以墨寶玉石碑刻呢個獨特方式嚟展覽《基本法》，象徵《基本法》作為香港繁榮穩定嘅基石，大家聽到覺得點呢？
噚日嘅展覽一共展出97位書法家、56位雕刻家嘅作品，張建宗就話97代表香港喺97年回歸，而56就代表中國有56個民族，亦顯示香港包容、多元。
之後張建宗就話，用墨寶玉石碑刻呢個獨特方式，象徵《基本法》作為香港繁榮穩定嘅基石。唔知呢啲墨寶玉石碑刻有冇提到，《基本法》係保障咗香港人嘅言論自由、同埋普選特首嘅權利呢？