今季由曼聯轉會愛華頓嘅前英格蘭隊長朗尼，最近因為醉駕，被揭發車內載有擬似小三嘅事件，喺英國搞到滿城風雨。已經被判停牌兩年兼罰款嘅朗尼，當地傳媒又點會咁易放過佢，英國《太陽報》最近一篇報道，就搵人分析朗尼面相，仲話佢呢種面型嘅男人最容易出軌。報道講：「你係咪想知你嘅男人會唔會出軌？如果佢嘅面相似朗尼，咁就大事不妙。朗尼呢種短而寛嘅面相，性慾極高，而且容易對伴侶不忠。」
其實《太陽報》係根據加拿大安大略省一所大學最近有項研究，從面相嚟推斷一個人係咪好色，結果發現好似朗尼咁面大又方嘅男性同女性，通常性慾最強同埋性觀念好開放，比起一般面形相對長同尖嘅人，容易出軌。
研究分為兩部分，第一部分用問卷調查咗145位學生，問及佢哋嘅性關係同性行為，第二部分參與調查嘅人數較多，有成314人，係根據第一部分啲問題再擴展，多咗問佢哋性傾向同埋手淫嘅頻率；然後總結兩部分所得問題，根據佢哋面形，得出以上結論。負責進行今次研究嘅Arnocky博士，就解釋面相會影響男女內裡嘅分泌激素。
報道講到嘅研究顯示，寛面嘅男性和女性，容易被誘發性衝動，好似荷李活女星金美侖戴雅絲（Cameron Diaz）及歌手Rihanna。四方面嘅男人比長面男人更有侵略性，更有支配慾及缺乏道德。呢種男人性慾更高，亦更接受隨意嘅性行為及腦海經常諗衰嘢喎。
我哋就搵咗麥玲玲師傅，睇吓朗尼係咪好似報道所講咁鍾意偷食：「朗尼個樣腮骨寛，係典型運動員樣，的確眉骨高鬥心大，眼亦深，有些事情唔會講你知，有隱藏性。而睇一個人係咪好色，要睇上唇薄較薄情，下唇厚性慾較強。」另外，麥師傅又指朗尼面相唔算靚，額頭濶而下巴短，做嘢會比較急進，有時做嘢唔算太理智，可能會諗起就去做。