近年香港政界湧現唔少女將生力軍，而且好多仲係年輕專業人士，港大學生會法律學會噚日舉行法律論壇，就請咗白鴿黨靚女大狀吳思諾，同埋新民黨「恩恩豬」容海恩，雖然吳思諾仍係政壇新丁，但火力一啲唔弱頻頻向恩恩豬挑機，而恩恩豬亦一如以往，不時有令八方忍唔住笑嘅「妙論」。
指英報告「侵蝕港人腦袋」
呢次除咗有吳思諾同恩恩豬，同場仲有法政匯思型男大狀吳宗鑾，吳思諾喺論壇除咗多次炮轟人大喺宣誓案中，未審完先釋法，令香港法治面臨極大挑戰，容海恩亦唔執輸，發表唔少「妙論」，好似話香港過去20年來，《基本法》落實「冇一個撼動喺度」，又形容香港司法獨立「係向上咁行，唔係倒後咁行」。
吳思諾其後繼續向恩恩豬挑機，例如講到中英聯合聲明，吳思諾就批評有中方官員話聲明已失效嘅言論，追問容海恩點睇，容海恩接招時，承認中英聯合聲明「唔係廢紙」，但之後突然中國外交部發言人上身，係咁話港人尋求外國幫助冇用亦冇需要，最搞笑係話英國政府發表嘅香港半年報告，係「侵蝕我哋香港人腦袋嘅一種干預」喎。