運輸署署長職位懸空咗兩個月，青嶼幹線較早前實施雙向收費搞到大塞車，運輸署都係得個副署長出嚟講聲唔好意思。到噚日政府終於宣佈搵到人，由財庫局副秘書長陳美寶由10月11日起調任運輸署署長。
運輸署咁大個政府部門竟然群龍無首，原因都係因為特首林鄭月娥埋班困難，最終由政務官黃偉綸、聶德權及羅智光3個常秘轉任局長，搞到政務職系十個茶煲九個蓋。前運輸署長楊何蓓茵7月尾升職做教育局常秘後，政府就搵唔到人接手。至於候任運輸署長陳美寶，任職政務官28年，做過多個部門。2012年起出任財經事務及庫務局副秘書長，打擊樓市炒賣嘅雙倍印花稅辣招就係由佢負責，經常去立法會向議員解畫，算係見慣大場面。