入咗白鴿黨7年，前日終於決定離巢嘅區諾軒，講述退黨經過時話，前晚諗咗十幾分鐘，先至下定決心喺facebook出post宣佈退黨。區諾軒話宣佈退黨後，佢喺電視見到前黨友羅致光嘅新聞，佢太太一見到CK就好搞笑同佢講：「你睇吓，人哋退咗黨係加入政府做官㗎！」區諾軒就話，自己冇打算加入政府，似乎好難成為「羅致光2.0」。
一直同區諾軒拍住上嘅白鴿黨副主席羅健熙就話，區諾軒係好大情大性嘅人，退黨令佢覺得對何俊仁、甘乃威等栽培過佢嘅人有啲內疚，又話雖然今次退黨事前知道嘅人唔少，但佢冇同甘威講過，唔知對方會有乜反應。但有一個人對佢退黨好高興，就係同佢同屬南區區議員嘅獨立民主派司馬文，司馬文噚日仲宣佈南區區議會嘅獨立民主派人數多一倍喎！