以前有本港機迷鍾意喺FIFA或Winning等遊戲，自己整香港球員入去隻game度，甚至好耐以前有人惡搞，將歐偉倫同李健和整上遊戲封面，又將陳肇麒變成熱刺嘅一分子，等大家笑一餐。
不過，下星期就出嘅人氣足球電玩遊戲《FIFA 18》，網上就出真係有實名香港球員喺隻game入面，就係今季升上英甲貝利一隊嘅18歲小將戴偉浚。
呢隻遊戲一向以世界各地唔同聯賽球隊夠齊全見稱，連英甲都係咁人齊。近日網上已流出戴偉浚嘅能力值圖，佢喺《FIFA 18》嘅總能力值有54，位置係CDM，即係中場中。如果睇番啲能力細分，速度係佢數值中最勁一環，有72，亦好符合現實；佢啲傳球、盤扭同防守能力就50幾，體能得48，而射波最差，得32咁多。出道能力低啲唔緊要，喺「career mode」會有上升空間，話唔定T-sun係隻潛力股嚟呢。