特區政府仲未正式刊憲話3.11補選新界東同九龍西兩個立法會議席，各方勢力已經贒實呢兩個位。連之前立會選舉輸咗，大鬧市民冇投票畀佢嘅陳雲，都不斷明示暗示自己會參加補選，一陣話未補選先興奮，又話一區只有一席，係自殺式參選，仲話城邦本土積極考慮全數參選。
國師呢排又係咁追擊奇華個彼岸花月餅廣告，有網民話國師係為參選係網上造勢，國師噚日仲係fb上載一張仿奇華廣告，用佢做主角嘅相，話未報名補選，已經有宣傳照。不過佢自從敗選之後，一時話要皇天擊殺香港人，又同教主黃毓民反面，有網民揶揄國師真係參加補選，隨時少票過上次。
長毛未定選唔選
至於另一可能參加補選嘅梁國雄，噚日有報道話佢唔玩3.11補選，八方噚日問長毛係真唔係？毛哥話有關報道只係有一半正確，佢解釋因為佢𠵱家等緊上訴，如果上訴成功，咁就自然毋須再參加補選，毛哥評估自己單覆核官司，到明年3.11補選前，至少已完成上訴庭審訊階段，屆時會視乎上訴結果如何，再決定是否參加3.11補選。