【《add》維羅納專訪】現年32歲的周秀娜（Chrissie）收起事業線，在影壇尋找新定位，今年終憑《29+1》征服觀眾，讓人認識演技派一面，最新勇於挑戰扮小三的cult片、60年代電影吸毒窮人角色。性感一面呢？她以態度定義，認為專注演好角色就是自己最性感時刻，這次穿上絲襪、高踭鞋，遊走意大利古城維羅納街頭，發現她性感永遠在骨子裏。
撰文：林嘉慈
造型：Harry Lam
化妝：Circle Cheung of ndnco.co
部份服飾提供：Calzedonia
性感，令周秀娜火速上位，亦一度局限她的發展空間，演活三字頭典型香港女生，用演技衝破框架，她對性感有新體會，「係一種自己嘅態度，有時未必關於外形上，但性感對我嚟講係正嘅！我哋好多時都係靠視覺，關乎於造型係可以去營造，譬如用絲襪、高踭鞋，甚至乎紅色唇膏。」自己專注做一件事的時候，就是最性感時刻，「我好鍾意去拍戲，好鍾意喺片場，好想拍好一場，點樣去詮釋佢，好enjoy嗰個moment就係最性感。」
欠信任揀分手
拍攝新cult片《女士復仇》，成為Chrissie近期最性感時刻之一，「做小三，但十年嚟都以為自己係正印，知道之後就同鄧麗欣互相搵對方，後尾發現仲有第四者樂基兒。」稱為cult片，皆因追逐互鬥是開槍、打打殺殺，「有好多動作場面，好血腥。喺龍華酒店拍，有幕喺天台，好似發哥咁雙手揸槍嘅場面。」角色精通電腦科技，能極速偵測正印目標，她勁呼好玩，「好少可以咁癲，角色好粗魯火爆，講晒粗口、食煙。」
曾拍拖就會知道發現自己是第三者的感受，因此Chrissie沒有特別去揣摩角色，開拍前只着重學揸槍姿勢、眼神，「贊同角色想知點解男友一開始就呃我，冇咗信任，唔需要再喺埋一齊。」換轉是她，她會選擇放手，「真係鍾意你唔需要逼住佢。」
瘦身演癮君子
另一套電影對於身心挑戰更大，是Chrissie首次接拍吸毒題材，故事圍繞60年代吸食鴉片，「上網睇好多資料，如果有錢去食，鴉片對外形唔會有太大影響，嗰個年代維持生活已經好難，仲要去食鴉片更難，唔係去到口水鼻涕流晒出嚟、食得好深嘅狀態，但有呢個癮，又冇錢，爭人周身債，係戒緊嘅過程。」由年代背景、甚麼是鴉片、吸毒原因，以至吸食的形態眼神，她都有做功課，「有去清減自己，令自己唔好咁精神、咁飽滿，咁啱開拍煙館戲時，佢哋話我瘦到唔好再瘦。」付出不少，希望她再有新突破。
收絲襪增情趣
首次到訪維羅納，Chrissie很融入這地方的生活方式，「晨早流流，早餐開始飲酒，跟住食雪糕。」當然亦啟動遊客模式，盡力跑景點，去勻競技場、茱麗葉露台，欣賞屬世界文化遺產的古建築。
購物也是必要的，Chrissie去總部設於當地的Calzedonia揀絲襪，問會否接受追求者送贈？她說：「會接受男友，真係另一半送絲襪，覺得係貼身得來，又好鬼細心嘅一樣嘢，可以增加兩個人之間嘅情趣，即係佢識得欣賞你。」
更多精采時尚內容，盡在 http://add.appledaily.com 。