政圈盛傳香港中聯辦主任張曉明將高升做港澳辦主任，而澳門中聯辦主任王志民就調嚟做香港中聯辦主任，原本傳聞話本周中會公佈，不過一直等到噚日仲未見有官方正式公佈。
習心腹入主西環
原來香港、澳門中聯辦已完成交接工作，王志民已入主西環，等小明今日同要退休嘅港澳辦主任王光亞交接埋，相信官方今日就會公佈。
八方聽聞澳門中聯辦前日已經辦舉行人事交接儀式，原中共中央對外聯絡部副部長鄭曉松正式接替王志民執掌澳門中聯辦，到噚日被喻為習近平心腹嘅王志民，就嚟香港履新，正式接掌香港中聯辦。至於小明就會返北京，今日出席港澳辦嘅交接儀式，正式接替已屆退休之齡嘅王光亞，出任港澳辦主任，預計等小明同王光亞正式交接完，國務院先會一次過對外公佈三地涉港澳部門嘅人士變動安排。
八方噚日睇香港同澳門中聯辦網頁，兩個機構阿頭仲係小明同王志民，似乎仲未有異動，而係北京訪問嘅保安局局長李家超，噚日去拜會港澳辦，喺門口等嘅記者見到坐私家車返港澳辦嘅王光亞，問佢係咪退休，王光亞亦冇答記者，只係揮手示好，有政界中人話好多建制派諗住宴請小明賀佢高升，怕且要賀小明，只好等建制派去北京時先有機會。
李八方