家陣大家都成日機不離手，就算出入離島玩，好多時都會影多幾張靚相，即時上載上網同朋友分享吸吓like，但係一個唔該，用到冇晒電就認真濕滯。不過𠵱家唔止坐巴士有得充電喇，新渡輪上個星期三開始，就喺渡輪推出免費充電站試驗計劃。
新渡輪話，離島慢船航程差不多有成一個鐘，乘客要休息充吓電，電子產品都有得充埋電，相信可以方便到唔少乘客，於是就喺3層渡輪「新國號」上面試吓加設充電站，只要乘客記得帶條USB充電線，就可以免費使用船上面，分別設喺船頭、豪華客艙同上層普通客艙中間嘅3個充電站，每個充電站分別有4個插座。
新渡輪仲話，試驗計劃暫時推行3個月，之後會檢討成效，如果市民真心覺得個充電站好用，就會逐步擴展至旗下船隊嘅其他雙層同3層普通渡輪。