英超打咗一個月有多，初步檢閱一班新兵表現，曼聯嘅盧卡古應該首屈一指。諗番起當日由愛華頓簽佢用咗成7,500萬鎊，包括小弟在內都唔信佢值呢個價，但我哋呢啲鍵盤戰士，又點會睇到摩連奴（圖）睇到嘅嘢呢？
齋睇數字，盧卡古七戰入七球，呢樣嘢已經冇得挑剔。冇錯，紅魔目前未鬥其他Big 6強隊，即係話大家之前睇死佢對強隊入唔到多波嘅數據，嚟緊仲有得拗。不過，佢喺呢幾場波展現嘅射術、爆發力同制空權，就真係令曼聯進攻時嘅威脅大咗好多，仲大過伊巴謙莫域上季在陣時。小弟唔係批評伊巴，但呢位瑞典神鋒一向係嗰種要以佢為中心，靠自己個人能力嚟救球隊，而盧卡古雖然有時都獨食，但肯同你夾，又後生過伊巴，活力同速度贏晒，成隊波節奏都快咗。攻守轉換快咗，同另一位新魔將尼曼查馬迪都有關。同樣過檔前有質疑聲音話佢老，但摩佬用咗馬迪咁多年，對呢位中場瞭如指掌，佢嚟到後，釋放咗保羅普巴，等呢位拍檔可以做更多box-to-box嘅工作。
車路士雖然錯失咗盧卡古，但亦搵到一個艾華路莫拉達，此子五輪亦有三球進賬。莫拉達善於楔位或偷位，吼對手防線出漏洞補捉機會，但上輪對阿仙奴場波就好明顯冇晒機會，因為人哋條後防冇大錯，而佢亦爭少少硬淨，所以令小弟特別懷念DC。至於對兵工廠嘅拿卡錫迪就反而有啲失望，暫時除開鑼日對李斯特城有波入，就少有佳作，論實效，大隻佬哥拉辛拿斯嘅助攻助守，反而仲搶眼，今次雲格真係執到好嘢。
文：盧卡東尼