深水埗明哥陳灼明義贈飯盒支持基層，近年得到好多人讚賞同支持佢，近年仲成立社企北河同行，擴展義贈飯盒服務，亦令好多人加入幫助基層人士行列，而嶺南大學宣佈向5名傑出人士頒授榮譽院士銜，其中一個就係明哥。嶺大介紹時，提到陳灼明又叫「深水埗明哥」，話佢義贈飯盒畀深水埗貧困露宿者嘅善舉，令佢家喻戶曉，仲話明哥原來每個星期派4日飯盒畀露宿者及長者，每次要派成接近400個，又形容明哥無私同仁慈，被人稱為「深水埗善心撒瑪利亞人」，而為表揚明哥對造福社會貢獻，決定向佢頒授榮譽院士。頒授儀式將於10月12日於嶺大陳德泰大會堂舉行。