每年嘅十．一國慶文藝晚會，例必俾網民話又悶又老套，不過呢啲愛國愛港節目最緊要政治正確，有冇人睇主辦單位根本唔志在！八方噚日聽到今年個表演名單同內容，已經覺得唔慌多人睇。
1,200萬製作費贈興
國慶籌委會可能要響應中央叫搞好年輕人工作，所以豪擲1,200萬製作費，分別喺10.1搞國慶文藝晚會、10.2搞國慶青年音樂會，不過八方見由藍絲導演高志森製作，怕且冇乜年輕人有興趣。高導話，青年音樂會請韓星INFINITE來港獻唱，至於有乜港星獻唱？高導噏完坤哥吳業坤個名，諗咗一大輪要問女助手先記得仲有林欣彤。
單係文藝晚會個名「實現中國夢」就已政治正確到不得了，高導介紹參與者仲嚇人，先話司儀係「陳百強先生」，八方即時嚇一跳，之後高導更正話「唔係，係陳百祥先生」！當晚表演有鄺美雲唱《我的祖國》，有人表演耍太極，重點係中國人民解放軍駐港部隊文工團軍民同心打鼓跳舞！今年就只有線娛樂台喺當晚獨家直播，ViuTV改成10月16日凌晨先播，相信已經反映到個晚會有幾吸引。
李八方