眾所周知，騎練羅理雅、沈集成早排合作出征韓國兩項大賽，結果空手而回。兩人這晚（20日）於谷草第二場三班1800米攜手贏「海利多」補數，該駒季內首戰即勝，單Win及組合獨贏A2分別派56及24元。
炒飯哥羅理雅早在開鑼日（3日）沙田已贏徐雨石馬房「好友益」，打響本身傷癒復出頭炮，今場「海利多」帶挈佢打開新季谷戰勝門；「海利多」由超級富豪信和老闆黃志祥長子黃永光持有，上季初由郭能贏三班谷草2200米開齋，這晚用羅理雅早段留住跑居後，末段從外叠打衝鋒，與內側冷馬「精壯神駿」短兵相接。最終「海利多」在炒飯哥車輪鞭下影相險勝短馬頭位，成為羅、沈配季內合作第一Win，可惜完全沒有馬主到場。
沈集成表示「海利多」之前由羅理雅試閘，已見好走勢，賽前都有少少擔心季內初出即跑千八米，可能影響發揮，好彩牠不算大隻馬，毋須熱身只要有充足操練，也可以搭夠，加上千八米路程正宗，故順利取勝。
反觀「精壯神駿」影相飲恨做二奶，馬主無緣連同上周三（13日）谷草贏「魔幻神駿」在內，自製一口隔周同主孖寶。高伯新馬房之「精壯神駿」跨季連捷落空之餘，更被沈集成攞晒彩，須知佢正係「精壯神駿」上手練馬師。
第二場二至四名分別為「精壯神駿」、「盈豐駿駒」及「文藝復興」，四重彩派二萬蚊鬆啲。