英超經過頭五周比賽，曼城、曼聯、車路士三大強隊排前三位，冇驚喜啦，最驚訝係升班馬紐卡素，竟然可以力壓熱刺、利物浦、阿仙奴等排第四，特別係自開季兩連敗後，竟然可以連贏三場，前利物浦領隊賓尼迪斯咁風光，又點唔令紅軍球迷牙痕。
車路士近年轉會操作進退失據已經唔係新聞，好似戰友盧卡東尼提及嘅尼曼查馬迪同盧卡古，一個俾車仔賣去爭標競敵曼聯，一個就轉會市場爭唔贏曼聯，都嚴重影響球隊發展。其實車仔另一個最大問題，係簽入好多潛質新星，但冇好好運用就賣走，盧卡古已經係例子，仲有奇雲迪布尼、穆罕默德沙拿、賴恩貝特蘭等等，唔少英超球隊都受惠，就好似紐卡素咁，上季都執到好嘢，就係「加納美斯」基斯甸艾素（左）。
早喺2013年，基斯甸艾素已經喺波圖彈起，好快就俾車路士睇中，不過佢同好多車仔星一樣，都缺乏表現機會，艾素更加一場正式比賽都未幫車仔踢過就變人球，先後借去維迪斯、愛華頓等，到上季就借到仲喺英冠嘅紐卡素，佢亦都射入五個聯賽入球，成為紐記贏得英冠升上英超嘅功臣之一。站喺財政角度，車仔以350萬鎊由波圖買入艾素，今季600萬鎊賣斷畀紐卡素，絕對係賺錢，但一個只係25歲當打之齡，仲可以踢左、右翼兼前鋒嘅國腳級人馬，用呢個價錢買到，賓尼迪斯真係瞓着都笑醒。艾素今季五場英超亦已貢獻一個入球一個助攻，如果季尾真係幫紐記搶到價值連城嘅前四歐聯位，車路士真係堪稱英超大慈善家。
文：牽牛