開季急先鋒練馬師原來係呂健威，呢位華人廐主今晚（20日）賽前排成績表次席，只落後領先的徐雨石一Win，甫開場第一場四班1200米，佢即贏「自由飛翔」追平徐雨石，此駒於停賽復出的祈普敦胯下取得跨季連捷，開出7.55倍啡燈Win，組合獨贏A2派28元。
五歲馬「自由飛翔」6月21日由祈普敦贏五班谷草一哩開齋，之後唞暑，隔咗一個暑假今晚復出縮程跑1200米，配搭照舊，沿途守八九位，結果半條直路後上如入無人之境，小勝0.5馬位，就此完成跨季谷戰連捷，停賽兩期復出的祈普敦贏馬補數，佢同時係新季首度為呂健威建功。
今場落飛黨極誇張，賭得狠中得應，「自由飛翔」賽前一兩分鐘仍是18倍，跑完開出啡燈Win得7.55倍，涉及注碼約170萬，在Win彩池獲利約1,100萬。「自由飛翔」搭亞軍「騏名燈」連贏位亦着綠燈跑完得番12倍，落飛黨收到盆滿缽滿，「騏名燈」周日（24日）於五班泥地短途亦屬正選，有機會匆出爭補中。
呂健威表示「自由飛翔」升上四班亦取得跨季連捷，皆因今場對手不算太強，五歲北半球愛爾蘭馬仍在壯年，未來尚有作為，雖然轉彎飛出五、六疊，但冇遮冇擋反而更好衝。
頭場二至四名分別為「騏名燈」、「力王」及「大運舞台」，四重彩派近八萬元。當中「力王」初配田泰安首次上名，所屬的霍利時馬房季內暫與安仔合作七戰，錄得三勝四位全上名。