低調咗幾年嘅全國政協常委唐英年，繼日前獲委任為西九文化區管理局董事局主席，佢有份搞嘅香港江蘇社團總會終於落地生根，噚日佢邀請咗各大媒體睇吓新架步，老實，真係幾靚，「1億蚊」買個7,000呎單位，仲要使2,000萬裝修！
總會嘅新會址喺灣仔駱克道一幢商廈，除咗辦公室，仲有個容納到120人都唔逼嘅多用途會議廳、會客室等。唐唐有介紹啲傢俬，好似德國搵番嚟嘅梳化、5張專登砌成紫荊花圖案嘅凳，佢話會址咁靚並唔係為自己，日後會員可以用來見客、見領導、開會。
唐唐話本來就睇中上環某單位，但業主坐地起價，最後揀咗灣仔呢度，單位要成「1億蚊」，幸好總會一話籌錢，會眾即刻喺1個月籌1.5億，唐唐同埋6位首席永遠創會會長每人捐800萬，眾志成城好快夠數。
八方見唐唐辦公室放咗中聯辦主任張曉明嘅「蘇港同輝」字畫，斷估值過千萬喇！唐唐相當識做，話幅字畫係無價嘅。