最近港鐵為咗賣廣告，將黑色嘅尖沙嘴站改做藍色（圖），同隔籬站嘅金鐘站一樣顏色，如果搭港鐵冇留意廣播，見到藍色月台就衝出咗車廂，隨時好似商經局前局長蘇錦樑咁講，要等多一班車囉。
文化評論人阿果話，港鐵設計月台時刻意用唔同顏色區分，方便市民辨認，但一個禮拜前為咗賣廣告就改咗設計，無理會市民可能落錯車喎。田北辰就鬧港鐵做法離譜，乜嘢位置都可以拎嚟賣廣告，忘記咗做公共運輸服務，其實要諗點樣便利市民，有啲市民慣咗記顏色出站，分分鐘落錯站。港鐵就話係今次尖沙嘴站月台廣告經過詳細考慮，確保車站名清晰顯示，方便乘客容易睇到。