打高爾夫一向畀人嘅感覺都係比較悠閒，18個洞嘅比賽，一打就係幾粒鐘。球員身邊又有球僮，打完一桿慢慢行去打下一桿，諗起都梳肝。但原來高爾夫唔係淨係得一種玩法，除咗傳統嘅慢慢打，仲有一樣運動叫速度高爾夫（speedgolf）。
顧名思義，速度高爾夫梗係「唔使急最緊要快」個friend，球手唔單止要跑去開波，每個洞中間都要跑之餘，仲要自己拎埋套球桿。聽講呢種運動最早喺1979年已經出現，不過有留意嘅人未必係咁多，依家喺北美地區、歐洲同日本都有人打，仲發展到有世界錦標賽添！唔單止咁，speedgolf仲有個健力士世界紀錄㗎，喺2005年10月16日，一個叫史密夫（Christopher Smith）嘅球手喺美國芝加哥嘅一項比賽，喺44分06秒嘅時間以65桿完成18個洞嘅比賽，得到109:06嘅成績。
其實速度高爾夫嘅成績係點計出嚟㗎呢？時間當然係一個好重要嘅元素，但球手一樣要打得準，因為所用嘅桿數越少，之後追加嘅時間亦會少啲，因為每一桿要追加嘅時間，就係一分鐘。下面舉個例解釋下：
‧球手A以48分19秒完成18個洞、標準桿72桿嘅比賽，佢總共打咗高標準桿13桿嘅85，咁佢嘅總成績就係133:19；
‧球手B喺同一項賽事雖然用多咗八分鐘、即係56分19秒完成，但係佢就打出低標準兩桿嘅70，所以佢嘅總成績就係126:19。
喺咁嘅情況下，球手B就係冠軍喇！
順帶一提，大家喺片段睇到嘅，係禮拜日舉行嘅2017年英國公開賽，Chris Benians打咗47分13秒，以高標準一桿嘅69完成，總成績係116:13。亞軍係George Boxall，佢嘅總成績就係116:17！