球星掛靴後多搞作唔出奇，不過多數都做番教練或從商，好少可轉做其他類別運動員，不過可能好快有多位代表人物嘞！ 38歲前曼聯後衞里奧費迪南，宣佈要轉型成為職業拳擊手，仲話目標要贏到金腰帶！
寄情打拳解喪妻之痛
里奧自從2015年掛靴後，對拳擊產生好大興趣，不時喺ig擺佢練拳嘅片段，加上之後受喪妻之痛，令到里奧更加寄情打拳。今年四月英國拳王祖舒亞喺溫布萊對烏克蘭拳手傑素高嘅一戰，都見到里奧入場睇，並且揸住祖舒亞條金腰帶合照㖭！
身高1米89嘅里奧費迪南喺2002至2014年效力曼聯，之後轉會昆士柏流浪踢咗一季後，喺2015年宣佈退休，掛靴後一直做評述員，另外都有經營時裝品牌。以球員時代嘅身材計算，里奧重82公斤，要打到重量級組別，不過𠵱家啲肌肉仲勁過球員時代嘅里奧就話冇有怕：「呢個係一個重大挑戰，我贏過好多冠軍，𠵱家要試吓贏金腰帶。」
怯，你就輸一世，里奧話呢次轉型都受到博彩公司Betfair嘅支持：「當佢哋提議我接受呢個挑戰，我就決定會好認真咁看待，因為佢哋會派出一隊專家支援我，我就好希望證明自己仲有料到！」而里奧將會跟隨𠵱家英國拳擊隊教練兼前WBC超中量級拳王活賀爾（Richie Woodhall）練習。
獲前WBC拳王大讚
活賀爾就大讚里奧係天生拳手：「佢天生右手力量好勁，而且好有熱情去學拳，當然技術上佢仲係幼嫩，但只要畀啲時間佢就冇問題，無論高度、臂長同體格佢都係個天生拳手。」
英國球壇之前都試過有球員轉行打拳，前鍚菲聯中場活侯斯（Curtis Woodhouse）就曾經喺2014年成為英國次中量級拳擊冠軍，而佢亦都喺twitter祝福里奧轉型成功：「冇人可以斷定你唔得，成功失敗就喺自己手中！祝你一切順利。」