喺周一上庭承認醉駕嘅愛華頓前鋒朗尼，除咗要接受法庭判罰之外，仲因為被停牌兩年，額外要畀多12萬鎊（約120萬港元）出嚟。朗尼認罪後，佢被判停牌兩年同埋100小時社會服務令，據報佢仲被愛華頓球會罰咗兩星期人工，即係32萬鎊。唔單止咁，因為佢未來兩年都唔可以自己揸車，要花多12萬鎊請司機，每星期至少四次載佢由佢豪宅來回拖肥嘅Finch Farm訓練場，仲有去做100小時社會服務都可能要用到司機。
另外，今晚愛華頓主場對新特蘭嘅英聯盃有特別安排，兩隊都會喺比賽用球衣上，印上「巴特利基金會」標誌（右圖），代替原本嘅贊助商商標。巴特利係早前因罕見癌症逝世嘅新特蘭小球迷，享年只得六歲。而比賽用球衣喺賽後會先由球員簽名再進行拍賣，為基金會籌款，以幫助面對同樣疾病嘅家庭。