喺香港一向人氣高企嘅前港督肥彭，周一再次抵港宣傳新書，噚日現身外國記者會演講時，仲吸引咗人氣一樣咁勁嘅「薯片叔」曾俊華到場，前政務司司長陳方安生、曾喺佢政府內擔任行政局議員嘅現任恒生銀行董事長錢果豐都有捧場。肥彭噚日一入門口，見到回歸前做佢私人秘書嘅薯片叔叔現身接佢，興奮到大叫「Ah」咗一聲，再同薯片叔講︰「How are you？Great to see you！（你好嗎？很高興見到你！）」然後就同薯片叔攬到實一實，咬住耳仔進入貴賓室敍舊。
兩女老過馬克龍 自嘆老
一向幽默的肥彭，自爆今次再訪外國記者會時，有記者透露喺佢做港督時，自己仲未出世，令肥彭慨嘆自己已好老餅，其間更將兩個愛女擺上枱，話佢有兩個女，比今年39歲嘅法國總統馬克龍仲老！結果引來與會者爆笑。
肥彭又話，早前送咗自己上一本新書《What Next?》畀95歲嘅皇夫菲臘親王，結果獲菲臘親王親自回信，信中寫：「What next？ When you are my age, there is only one answer.（接着是甚麼？當你是我這年紀時，只有一個答案）」結果再次引來與會者爆笑。今年73歲的肥彭搞笑話，自己本可以同菲臘親王一樣答法，但佢決心未來幾年要製造越多麻煩越好，希望可以為駁斥民族主義出一分力，批評呢種思想危害下一代，令社會唔可以保持繁榮、安全同穩定喎。
噚日亦有人搞笑問肥彭，若然佢現時係英國首相會做啲乜？肥彭就話會到訪香港，同埋做幾件西裝，並且對英國政府最近發表的「香港半年報告」比過去誠實同敢言感到欣慰。
李八方