上星期廢紙回收商停收廢紙，好多靠執紙皮幫補生計嘅公公婆婆生活難上加難，社福界前立法會議員張國柱同一班社工，即時想做啲嘢幫班公公婆婆，但要咁短時間搵到善長仁翁捐助並唔容易，最後邊個肯拔刀相助？原來係自由黨榮譽主席田北俊。
阿柱喺fb話，佢當日同班社工想諗方法，幫補執紙皮嘅公公婆婆買食物，傾完之後認為派超市禮券係最簡單嘅方法，但問題係搵邊個捐呢？呢個時候阿柱個腦突然彈出田少個名，因為差不多半年前，田少喺一個論壇後同佢講關心街頭執紙皮長者，問佢有乜可以合作，於是阿柱立即發短訊畀田少，估唔到田少幾分鐘後就答應捐五萬蚊超市禮券（圖）。阿柱話今次咁快成事，除咗要多謝一班探訪公公婆婆、協助送禮券嘅義工，仲要多謝田少呢位善長。