大熱天時，有時車廂人多擠迫，就算有冷氣都覺得焗。九巴於是用4個月時間研發出全港首部太陽能發電裝置嘅雙層巴士，改善車廂內嘅溫室效應，呢架巴士會今個星期喺屯門區試行，暫時亦只先試行一架雙層巴士，初部評估裝置能夠令車廂溫度降低5至10℃，而且九巴亦已為裝置申請發明專利並等待審批。
供電畀USB插座
巴士車頂會加裝20塊約1米乘0.6米嘅太陽能電池板，車廂內加裝電池、車廂溫度感應器同抽風系統。巴士引擎停轉時，系統自動將太陽能轉化為電能，為通風系統供電，將車廂嘅熱空氣抽出車外；引擎運作時，亦會供電畀九巴內嘅USB插座，可以為20部智能電話叉電，太陽能電力亦會儲存喺備用電池，夜晚冇太陽能時，備用電池仍可供電畀USB插座。九巴期望稍後能供電畀車廂內嘅WiFi系統等，亦會陸續安裝太陽能裝置喺更多巴士上。