華倉季初呢期堅係旺，練馬師排行榜前五名都係屬於佢哋，上季有39W嘅葉楚航又點可以執輸，等同行威晒而自己食白果呢！
今朝早（18日）就係葉廐嘅快跳課期，當中唔少今期夜賽出戰馬都由今仗鞍上人主理，例如二場「可愛寶」、三場「大寶庫」及七場「狀元才」。
其中「狀元才」由韋達出試嘅時候，航哥突然走到欄邊，同一眾攝記併排企，以仰望角度近距離觀看課快跳操成點，航哥仲睇到嘟起個嘴仔，個樣勁集中。
之後，十三少就走咗上烽火台向廐主匯報，全程雞啄唔斷之餘，仲開埋馬會賽果頁面嚟研究。以咁積極嘅動靜，就算呢匹馬由十三少策騎都好，點都要預留一席啦！