特首林鄭月娥上場後成立土地供應專家小組，檢視土地供應來源，未來會有「大辯論」。睇番搵地方向，唔少人將注意力聚焦開發郊野公園及維港以外填海等，但有地產界高人話小組成員名單內藏玄機，似乎發展荒置農地先係林鄭最想打嘅主意。
真．專家地產商無影
睇返小組成員組成，大型地產商及商會代表欠奉，諷刺係揸住最多地嘅卻係地產商；講到現成「供應」，佢哋先係真．專家！最終影都唔見。
有地產界人士話顯然係悉心安排，皆因若然有地產商在內，任何建議都會被指官商勾結；若一席都冇而最後係由「專家」建議政府收回農地或公私營合作開發農地，咁就可以避過勾結之嫌。
呢位地產界人士話，可以預計搞郊野公園同填海嘅爭議性都極大，就算專家小組建議，政府要推行亦比較困難，反而發展荒置農地，只要冇農耕受影響，推行阻力自然會較少，尤其林鄭絕非煲呔、亦都唔係689，畀人感覺同地產商冇咁親近，落實機會肯定較前兩任特首更高。
至於對地產商嚟講，此舉是好是壞？似乎要睇下政府開出乜嘢價！