澳門立法會選舉曲終人散，大佈局未有重大變化，反而一海之隔嘅香港政局，卻因選戰結果有變化。八方之前寫過，待澳門立會選舉結束後，香港中聯辦主任張曉明會升呢，北上接替退休嘅王光亞做港澳辦主任，澳門中聯辦主任王志民則調任香港西環揸旗，果然政圈流傳中央日內宣佈有關人事變動，小明嘅仕途似乎真係「彩虹總在風雨後」。曾以鐵腕手法打佔中、發放催淚彈後稱「太陽照常升起」嘅佢，北上後料以硬姿態炮打港獨。
王志民回歸西環揸旗
之前部份政界對小明嘅仕途，似乎唔多睇好，仲有人話王光亞要坐到中共十九大後㖭，但接近北京消息人士話，習大大極度欣賞張曉明嘅強硬作風，尤其對佢安排嘅七一訪港行程好滿意，試問小明仕途又點會受影響？至於小明一旦喺港澳辦話事，相信都係續走強硬路線，追打港獨自然少不免，而嚟緊仲有唔少港務同法律有關，例如國歌法、《基本法》教育同23條立法等籌備，由讀法律嘅小明坐鎮港澳辦，似乎都有啲因由。
至於60歲嘅王志民，過往都喺香港西環做過副主任，之前專責掌管青年事務，同中央要搞香港青年發展嘅方向啱晒key。咁邊個接替王志民做澳門中聯辦主任？《星島日報》噚日引述消息指，中央對外聯絡部副部長鄭曉松會接替王志民，最快本周公佈任命。
議員任期內曾與小明交手嘅支聯會主席何俊仁話呀，小明傳晉升港澳辦主任，反映中央對港將施以強硬路線，相信小明接任後不但唔會緩和社會氣氛，「而係會更加刺激對立、甚至製造矛盾，再用高壓手段鎮壓」，相信中央可能要求政府強推23條立法。
李八方