每逢周日司局長都會「交功課」，藉住網誌交代過去一周或未來有乜搞作。勤力如政務司司長張建宗又點會欠交？
佢喺最新網誌話根據政府統計處最新公佈數字，香港整體勞動人口參與率50年後估計下跌至接近10%，可見勞動人口持續萎縮，勞動市場人才不足嘅問題迫在眉睫，預告由政務司司長領導嘅人力資源規劃委員會即將成立，全面檢視人力規劃。
其後佢話一帶一路發展同政府推展嘅基建項目，創造大量就業機會，尤其需要大量機電工程人手，但業界長期唔夠人，需要年輕生力軍加盟，希望家長支持有志加入機電工程、工藝同其他技術行業嘅子女，強調社會已經再冇藍領、白領之分，機電業等技術員大有作為，可以向上流動，絕對唔係手作仔。唔知呢番肺腑之言，影唔影響到家長改變舊觀念？