皇家馬德里球星、葡萄牙嘅基斯坦奴朗拿度（C朗），因為喺季初西超盃兩黃一紅之後推球證，總共被西甲賽會罰停賽五場，暫時仲未可以喺國內賽事復出，而佢就趁住呢個空檔，帶埋女友佐真娜（Georgina Rodriguez）返咗老家葡萄牙，喺上星期六睇母會士砵亭主場以2:0擊敗唐迪拉嘅葡超賽事。32歲嘅C朗喺1997至2002年係士砵亭青年軍成員，之後亦喺士砵亭展開咗職業球員生涯，雖然佢只係踢咗一季就轉會英超曼聯，但佢今次返到母會，依然好受當地球迷歡迎，唔少球迷一齊大聲唱佢個名，可見C朗喺士砵亭球迷心目中仍然好有地位。