國際特赦組織香港分會噚日舉辦咗《第七屆人權紀錄片電影節》，呢場社區放映走入橫洲，播一套情節同橫洲逼遷事情極之相似嘅《官商黑拆村全紀錄》。
電影講述遠在巴布亞新畿內亞嘅故事，一條村莊俾發展商同政府以發展度假村為名聯手逼遷，仲出動子彈驅趕。村長阿祖挺身而出，拜託人搵齊法律文件揭發官商勾結，誓保家園！情節係咪同橫洲居民對抗收地好似呢？
播完電影，仲有橫洲居民現身說法。鄭小姐喺橫洲永寧村由細住到大，對條村好有感情，但政府連告示都冇張就話要收地，仲口口聲聲話「做足諮詢」，𠵱家一切已成定局，鄭小姐真係有怨無路訴，出年1月就清場，到時要眼白白睇住家園盡毀！電影節22日起一連9日喺百老匯電影中心上映7套人權紀錄片，相信有助大家知多啲關於捍衞人權嘅事。