這天(17日)星期日假期，沙田馬場晨課比較淡靜，但有位廐主卻擺出搏命姿態，就是告東尼，整朝在烽火台專注觀看旗下賽駒操練，拿起望遠鏡不苟言笑，緊張到不得了，明顯滿腹出擊大計。
本周三(20日)谷戰告東尼有5駒列陣，分別是「華美之友」、「英勇大師」、「星光大師」、「華美之寶」及「超自然」，今朝牠們都在泥地大跑道單試或拍跳力谷狀態，告東尼最着緊正是此5匹馬，一直吼實冇離開過視線。
其中角逐五班1800米的「超自然」，季內已熱過身一仗並跑第三，今仗當然是機會分子。還有二班1200米的「英勇大師」亦不可睇低，月初試大閘有前有後勝出，狀態早已操起，話晒係上屆特首盃亞軍，當時跑贏第三名馬綠魔「有得威」，如今在二班谷草只負119磅，形勢有利。
告東尼堂堂超級大倉，現時卻淪為三個還未開齋馬房之一，有失身份，唔心急贏馬就假，難怪佢今朝咁緊張，周三谷戰一定盡情搏殺。
還未開齋馬房：告東尼、李易達、麥菲文