雖然世界普遍對同性戀嘅觀感日漸開放，但職業運動界，特別係足球界仲係禁忌，好似英格蘭仲未有現役職業球員正式出櫃；英甲查爾頓就創先河，以職業球會名義組織一支同志球隊，希望可以加強球迷對同志球員嘅接受程度。英國業餘同志球隊其實唔少，好似倫敦就有支叫Bexley Invicta，查爾頓就以呢支業餘兵做基礎，唔單止係原本男同志隊員，仲廣招女同志、雙性戀同跨性別人士等性小眾，不過參與咩比賽就仲未知。身為球員兼領隊嘅加利堅拿就話：「以往同志踢波好慘，成日面對冇球場、冇對手嘅情況，希望查爾頓今次行出第一步，可以令球壇改變呢個情況。」