連人帶車直衝落海，呢啲情節喺電視同電影就見得多，但若有一日輪到你不幸遇到咁嘅情況，又應該點樣逃生？原來最緊要識運用槓桿原理，同埋記緊「黃金3秒」法則！
呢兩個逃生要訣，係由香港賽馬會災難防護應變教研中心搞嘅「防災！從生活出發」微電影創作比賽，奪得大專組銀獎同「觀眾至Like大獎」嘅同學仔教嘅。
條片提到有個都市傳說，一位女士因為「飛車」衝咗落西環碼頭而死亡；如果佢識得運用槓桿原理，用鐵鎚將車窗嘅四個角落打爛，玻璃就容易碎開，逃生機會就大好多。當然，最大可能脫險嘅方法，都係喺架車入水嘅3秒內立即打開車門逃生。
上述嘅災難求生知識可能你識得、但未必記得同用得。而呢個比賽收集咗19份中學同大專生作品（圖），大家不妨花少少時間睇睇佢哋嘅求生錦囊，溫故知新、防患未然。