以傑斯、碧咸、史高斯、尼維利兄弟等組成嘅曼聯七小福，係紅魔90年代最標誌性嘅青訓產品，除咗領隊費格遜，當中有位幕後功臣，就係青年軍教練艾歷夏里遜，但係呢位曾為曼聯工作27年嘅老臣，今年患上認知障礙症（前稱老人癡呆症或腦退化症），好彩一班弟子冇忘恩負義，仲不時去探佢，最新就係咸爺現身探恩師喇！
攜手奪92青年英足盃
一講七小福，當然會諗起費格遜，不過一開始，呢班小朋友當年點解得到重用？皆因佢哋贏咗92年青年英足盃，而當時嘅教練就係夏里遜。飲水要思源，若然冇呢位青年軍教練，咸爺同史高斯就未必咁快得到費Sir賞識。
夏里遜今年確診患上認知障礙，所以當一眾弟子知道消息後，就算好似碧咸呢個大紅人，都抽時間探望；夏里遜個女域琦就講番班前球星點樣知道夏里遜患病：「我囝囝祖爾睇到爺爺手機，知道有呢班球星電話就大膽搵佢哋，唔使一星期，佢哋就陸續出現探望爸爸，我都覺得好意外。」
域琦話79歲嘅爸爸身體唔錯，最搞笑係班球星對住夏里遜，仲好似當年細路學踢波咁，仲會有啲膽怯，不過最難過係鍾情足球一生嘅夏里遜，家陣已經對足球失去熱情，好少睇直播。而祖爾正籌備緊倫敦至白禮頓嘅單車慈善賽，為認知障礙症病人籌款，預料七小福都會有錢出錢有力出力。
咸爺空降威爾斯受歡迎
講開咸爺，近日佢就無啦啦坐私人直升機，空降威爾斯乙組聯賽球隊Llanrhaeadr FC嘅球場，令當地居民爭相嚟搵呢位前曼聯球星影相。呢間球會仲好幽默咁喺twitter話「已經同咸爺傾掂數簽埋約，只要搞掂埋轉國籍等手續就會加盟」；及後又轉載村莊一對母女同咸爺嘅合照，仲話佢架直升機降落時，搞到球場穿咗個大窿，好多同村嘅居民都話估唔到可以親眼見到萬人迷。至於咸爺點解到埗，就唔係好多人知，一般估計都係拍廣告或者係其他商業贊助搞活動，所以先大駕光臨。
