雷神始終係雷神！正當榜首位置漸受田泰安威脅之際，莫雷拉在今午（16日）第三場五班泥地一哩展示神級功架，騎轉投羅富全馬房初出的「鑽之友」留前鬥後，直路狂追多個馬位反敗為勝，單Win及組合獨贏A1分別派38.5及24元。
六歲馬「鑽之友」健康一直正常冇傷病紀錄，上季仲養緊喺吳定強馬房（已解散），再之前則由蔡約翰訓練，今季改由曾任蔡廐副練多年的羅富全訓練，人馬可謂再續前緣。
結果型佬羅富全冇令馬主失望，「鑽之友」沿途居七至九位之間，直路在外疊狂追，反勝對手0.5馬位掄元，羅富全以此駒作個人從練首場泥地頭馬，且與雷神累積季內合作三駒「銘記心中」、「七彩」及「鑽之友」贏晒，堪稱無敵騎練組合。
第三場算係熱門天下，事關大熱「鑽之友」行頭勝出，落飛次熱「大道至公」跑第二，另一有飛馬「漸信名駒」第三，第四名由冷馬「通勝」拎到，四重彩派二萬二千幾。